Fyrri umræða um skipun stjórnlagaráðs á þingfundi í dag
02.03.2011 10:36
Fyrri umræða um þingsályktunartillögu um skipun stjórnlagaráðs verður tekin fyrir á þingfundi í dag samkvæmt fyrirliggjandi dagskrá á vef Alþingis. Þingfundur hefst klukkan 14. Flutningsmenn tillögunnar eru Álfheiður Ingadóttir, Birgitta Jónsdóttir og Valgerður Bjarnadóttir.
Þær sátu í samráðshóp sem var skipaður um viðbrögð við ákvörðun Hæstaréttar um að ógilda kosningu til stjórnlagaþings. Niðurstaða meirihluta samráðshópsins var birt 24. febrúar en þar þar kom fram að vænlegast væri með hliðsjón af öllum aðstæðum að Alþingi kæmi með ákveðnari hætti inn í endurskoðunarferlið með skipun ráðgefandi stjórnlagaráðs með þingsályktun. Við skipun í ráðið væri rétt að þeim sem hlutu mestan stuðning í kosningum þann 27. nóvember 2010 til stjórnlagaþings, væri boðið að taka sæti í ráðinu sem fengi það verkefni að taka við og fjalla um skýrslu stjórnlaganefndar og gera tillögur um breytingar á stjórnarskrá lýðveldisins Íslands nr. 33/1944. Með þessu nýttist jafnframt sá undirbúningur sem lagt hefði verið í og tafir á endurskoðunarferlinu yrðu litlar sem engar. Þannig verði þeim sem hlutu kosningu 27. nóvember 2010, sem síðar var ógilt, falið ráðgefandi hlutverk gagnvart Alþingi.
Að álitinu stóðu fulltrúar Samfylkingarinnar, Vinstrihreyfingarinnar - græns framboðs, Framsóknarflokksins og Hreyfingarinnar. Fulltrúi Sjálfstæðisflokksins í samráðshópnum skilaði séráliti.