Stjórnlagaráð

Tryggið öllum heilsufrelsi

Heilsufrelsi, samtök um kjörlækningar, beinir þeim tilmælum til stjórnlagaráðs, að í stjórnarskrá Íslands verði tryggt heilsufrelsi, þannig að hver einstaklingur hafi rétt til að velja þær leiðir sem hann kýs til að viðhalda eigin heilbrigði og ákvörðunarréttur hans verði virtur.

Undanfarna áratugi hefur vitneskja og kunnátta Íslendinga aukist um að fleiri leiðir eru til að viðhalda heilsu en hinar hefðbundnu vestrænu lækningar. Aldagömul þekking á íslenskum Jurta- og grasalækningum hefur vaxið og þróast á síðustu árum og grætt margra mein. Stór hópur Íslendinga hefur kynnt sér og lært bæði hérlendis og erlendis hinar ýmsu kjörlækningar sem fjölmennur hópur fólks nýtur nú góðs af.

Þrátt fyrir þann góða árangur sem þessar nýju leiðir og þekking hefur fært okkur er mikil hvatning í regluverki þjóðarinnar til að stoppa af þróun á þessu sviði. T.a.m. eru sífellt fleiri boð og bönn á innflutningi jurta og bætiefna. Samfara auknum áhuga almennings á lífrænt ræktuðum vörum og heildrænum aðferðum skýtur það skökku við að hið opinbera virðist hafa það að markmiði að leggja stein í götu þeirra sem selja náttúruvörur. Vel upplýstur almenningur er fullfær um að ákveða hvort hann vill nota náttúruleg efni eða ekki. Það er nær óhugsandi að rökstyðja þessi höft á þann hátt að verið sé að vernda almenning og spyrja má hverra hagsmuna þetta þjóni, sem sýnist helst vera þröngri stétt lyfjasala sem sífellt sækjast eftir einokun á fleiri vörum.

Mjög varasamt er að veita apótekum einkaleyfi á sölu bætiefna og náttúruefna því að hætta er á að apótekin takmarki framboð eða jafnvel taki efni af markaði, enda gróðavænlegra að selja tilbúin lyf lyfjafyrirtækjanna. Áróður fyrir slíkri öfugþróun hefur átt sér stað um allan heim undanfarin ár og hann verður að stöðva.

Heilsufrelsi, samtök um kjörlækningar, fer því fram á við stjórnlagaráð, að öllum verði tryggt heilsufrelsi í stjórnarskrá Íslands.

F.h. Heilsufrelsis,

Jóna Ágústa Ragnheiðardóttir, ritari.
Jörundarholti 158, Akranesi.