Stjórnlagaráð

Náttúra og umhverfi

Í tillögu A-nefndar að texta í áfangaskjali er undir 28. grein upptalning á sérstökum atriðum sem ástæða þykir til að standa vörð um.

Þarna finnst mér vanta að taka til atriða sem varða heilsu okkar allra en það er annars vegar hávaðamengun og hins vegar mengun af völdum útvarpsbylgna.

Af sömu ástæðu að við viljum búa við óspillt drykkjarvatn og óspillta náttúru, ættum við að vilja búa í samfélagi þar sem við getum treyst á að verða ekki fyrir langvarandi áhrifum af hávaða (svefnleysi og einbeitingarskortur hafa áhrif á framlegð og sálarró) eða útgeislun hættulegra bylgna af völdum t.d. rafeindatækja eða útvarpssenda (vefjaskemmdir sem leiða til sjúkdóma).

Ekki er mér alveg ljóst með hvaða hætti þetta ætti að koma inn í stjórnarskrá, en miðað við þá framtíð sem við siglum inn í, fyndist mér viðeigandi að því væru gerð skil.