Stjórnlagaráð

Í 4. grein mannréttindakaflans segir:

„Allir skulu njóta friðhelgi einkalífs, heimilis og fjölskyldu.

Ekki má gera líkamsrannsókn eða leit á manni, leit í húsakynnum hans eða munum, nema samkvæmt dómsúrskurði eða sérstakri lagaheimild. Það sama á við um rannsókn á skjölum og póstsendingum, símtölum og öðrum fjarskiptum, svo og hvers konar sambærilega skerðingu á einkalífi manns.

Þrátt fyrir ákvæði 1. mgr. má með sérstakri lagaheimild takmarka á annan hátt friðhelgi einkalífs, heimilis eða fjölskyldu ef brýna nauðsyn ber til vegna réttinda annarra.“

Þarna þykir mér opnað fyrir möguleikann á mjög víðtæku framsali á dómsvaldi til framkvæmdavalds.

Ég á erfitt með að sjá undir hvaða kringumstæðum það sé réttlætanlegt að takmarka friðhelgi einkalífsins án þess að dómsúrskurður komi til.

Ég hvet til þess að þessi undantekning verði endurskoðuð. Að öðrum kosti þætti mér vænt um að heyra dæmi um aðstæður þar sem nauðsynlegt gæti talist að ganga á rétt fólks til friðhelgi einkalífs þar sem dómsúrskurður er ekki möguleg lausn.