Stjórnlagaráð

Þess er hér með góðfúslega farið á leit við Stjórnlagaráð að það beiti sér fyrir bættri réttarstöðu dýra á Íslandi. Í þeim tilgangi verði til grein í nýrri stjórnarskrá Íslands með eftirfarandi ákvæðum:

Dýr búa yfir þróaðri tilfinningagreind og sjálfsvitund og eru því skyni gæddar verur.

Með lögum skal tryggja réttindi dýra samkvæmt eftirfarandi:
- manninum er skylt að sjá til þess að eðlislægum þörfum dýra sem hann hefur á forræði sínu sé fullnægt
- manninum ber að tryggja að dýrum, villtum sem tömdum, sé ekki haldið við þvingandi og kvalafullar aðstæður
- manninum ber að stuðla að verndun villtra dýra og tryggja að kjörlendi þeirra sé ekki spillt

Helstu rök fyrir bættri réttarstöðu dýra:

Dýr búa yfir tilfinningum og sjálfsvitund á líkan hátt og mannskepnan:
- þau skynja ótta og sársauka, áþján og vanlíðan
- þau skynja gleði og vellíðan, umhyggju og nærgætni
- þau hafa sjálfsvitund og skynja stöðu sína innan hóps
- þau eru forvitin og athugul
- þau eru skyni gæddar verur og ber að umgangast sem slíkar

Tilfinninga- og náttúrugreind dýra og manna er grundvöllur þróunar tegundanna:
- hún gerir þeim kleift að lifa af í náttúrunni
- hún er helsti hvati sjálfsbjargarviðleitni þeirra og lífsvilja ásamt óttatilfinningu og sársaukaskyni
- hún grunnur lífsréttinda þeirra og frelsis undan áþján og kvalræði

Sökum stöðu sinnar í lífríkinu ber maðurinn ríkar siðferðislegar skyldur gagnvart öllu lífi:
- honum ber sérstaklega að huga að velferð dýra sem hann hefur í umsjá sinni
- honum ber að huga að eðlislægum þörfum dýra sem hann hefur í umsjón sinni
- honum ber að sjá dýrum sem eru á hans forræði fyrir skjóli og næringu við hæfi
- honum ber að stuðla að verndun villtra dýra og tryggja að kjörlendi þeirra sé ekki spillt
- honum ber að tryggja að villtum dýrum sé ekki haldið við langvarandi þvingandi aðstæður, t.d. í búrum og í dýragörðum