Stjórnlagaráð

Ágæta Stjórnlagaráð,

ég vil leggja til eitt atriði við samningu stjórnarskrár: að í stað orðsins þjóð komi í öllum tilfellum „íslenskir ríkisborgarar" eða „íbúar á Íslandi" þar sem það á við. Þannig verði skerpt á því að um lagaleg réttindi sé að ræða, án þeirra óljósu skírskotana og huglægu yfirtóna sem fylgja orðinu þjóð. Í stað „Alþingi fer með löggjafarvaldið í umboði þjóðarinnar" kæmi þá „Alþingi fer með löggjafarvaldið í umboði íslenskra ríkisborgara". Ríkisborgararéttur skarast enn sem komið er að miklu leyti við þjóðerni, en það er sögulegum tilviljunum háð, ekki sjálfgefið að það verði alltaf tilfellið. Það er mikilvægt að réttindi fólks og staða innan samfélags sé tryggð skýlaust í stjórnarskrá óháð því hvaða þjóðerni það leggur til grundvallar sjálfsmynd sinni.

Að sama skapi gildir um greinina sem nú er svohljóðandi: „Náttúruauðlindir Íslands eru sameiginleg og ævarandi eign þjóðarinnar" - að hún yrði ekki þjóðbundin: „Náttúruauðlindir Íslands eru óframseljanleg eign íslenskra ríkisborgara sameiginlega."

Með góðri kveðju,

Haukur Már Helgason.