Stjórnlagaráð

Nokkrum sinnum frá stofnun lýðveldisins hefur kosningalögum verið breytt. Mikil og hörð átök urðu árið 1959 og börðust framsóknarmenn hart gegn þeirri lagabreytingu sem þá tók gildi. Síðan hafa orðið minni háttar breytingar og síðast árið 1999 var kjördæmaskipan breytt - til hins verra. Kjördæmaskipan eins og hún var fyrir 1999 var fyllilega ásættanleg - það eina sem í raun þurfti að gera var að færa til þingsæti milli kjördæma eftir breytingu á búsetu. Við förum ekki framhjá því að til þess að jafna vægi atkvæða í landinu fjölgar þingmönnum í þéttbýlinu af eðlilegum ástæðum. Ég legg til að kjördæmaskipunin verði færð til þess sem hún var fyrir 1999 en breyta má fjölda þingmanna í hverju kjördæmi eftir búsetu eða nota jöfnunarsæti með einhverjum hætti. - Hvers vegna breyta þessu? Kjördæmin eins og þau eru nú eru of stór til þess að þingmenn eigi þess kost að hafa þá yfirsýn sem þeir þurfa. Kjördæmi sem nær frá Hornafirði í austri að Tröllaskaga í norðvestri er allt of stórt. Sömuleiðis sé ég ekkert vit í kjördæmi sem nær frá Tröllaskaga um Vestfirði suður í Hvalfjörð. Þá hef ég engan skilning á skiptingu Reykjavíkur í tvö kjördæmi, - Reykjavík norður og Reykjavík suður. Reykjavík skal vera eitt kjördæmi. Kraginn verði Gullbringu- og Kjósarsýsla ásamt Mosfellsbæ, Kópavogi, Seltjarnarnesi, Garðabæ, Álftanesi og Hafnarfirði og bæjarfélögunum sunnan Hafnarfjarðar. Suðurkjördæmi verði frá Hornafirði að Gullbringusýslu.

Eiga þingmenn að vera 63? - Eftir tillögu minni sem birtist hér undir fyrirsögninni Framkvæmdarvaldið skulu ráðherrar vera utan Alþingis. Má þá ekki fækka þingmönnum um þann fjölda ráðherra t.d. 6-8 sem oddviti framkvæmdarvaldsins velur?

Ég vona að þessar hugmyndir geti orðið að einhverju gagni í störfum Stjórnlagaráðs.