Stjórnlagaráð

Fjöldi þingmanna á Alþingi hefur verið mér lengi hugleikið efni!

Mér segir svo hugur að við höfum flesta þingmenn á hverja þúsund íbúa hér á landi í samanburði við önnur lönd. Fækka ætti þingmönnum í 33 og þeir eingöngu að hafa þrjú kjörtímabil til setu á þingi. Hver þingmaður fengi meira vægi í allri umræðu og almenningur hefði betri yfirsýn um þeirra málaflokk.

Í framhaldi af því ætti að aðskilja framkvæmdar- og löggjafarvald – forsætisráðherra kosinn af almenningi – ekki láta þingmenn kjósa ráðherra – það kallar á óbreytt ástand ef þingmenn hafa það vald – með litlum valdaklíkum!

Á Alþingi þarf að veljast breiður hópur fólks – atorkusamt og réttsýnt. Íslenskt samfélag er lítið samfélag en að sama skapi að takast á við flóknar spurningar líkt og stærri lönd! Hér eiga boðleiðirnar að vera styttri til almennings frá þinginu en í stærri löndum! Svo virðist ekki vera í dag. Þingmenn í dag geta „falið“ sig á bakvið hina ýmsu málaflokka og lítt verið samkvæmir sjálfum sér. 33 þingmenn kallar á meiri skilvirkni þeirra og aukið vægi þeirra og þeir að sama skapi fá meira aðhald.